politika blogomondo

en aprilo kaj majo 2012 francaj ŝtatanoj voĉdonos por nova prezidanto.  la precipa streĉo estas inter la nuna liberala prezidanto nikolao sarkozy kaj la socialisma kandidato francisko hollande, sed iom nove en la politika pejzaĝo tri aliaj kandidatoj pezas ĉirkaŭe po dek elcentoj da voĉdonintencoj.

en tiu cirkonstanco la gazeto „la mondo“ bildigas la viglecon de 1491 politikaj blogoj.  en la koncerna „mapo“...

• kaŝtankoloro montras la „dekstran“ naciisman flankon (maldekstre en la bildo!)
• bluo montras la liberalan flankon
• brikkoloro montras la moderisman flankon
• verdo montras la naturprotektan flankon
• rozkoloro montras la socialisman flankon
• ruĝo montras la „maldekstran“ kontraŭkapitalisman flankon

la punktoj rolas kiel retejoj, la strekoj simbolas hiperligojn de unu al alia.

per alklako sur la apuda bild-kopio vi atingos la interagan mapon.  en ĝi per la rul-butono de la muso oni zomas kaj malzomas.  per premo de la maldekstra butono kaj glitigo oni movas la fokuson.  per alklako sur punkto de retejo oni evidentigas la ligojn, kiujn ĝi havas kun aliaj retejoj.  per ctrl+alklako oni daŭrigas selektadon de retejoj...  aliaj funkcioj multas, mi ne klarigos ĉion.

tiu mapo estas interesa ilo, per kiu la aŭtora kompanio, laŭnome linkfluence, reklamas sian talenton por opiniesploroj en la reto.  tiun servon ĝi provizas al administroj, firmaoj kaj aliaj mendantoj pri ajnaj temoj.

blogovigleco ne prognozas la rezulton de la baloto.  opinisondoj pli rekte demandas, kiel homoj volas voĉdoni.   se vi scivolas, iliaj lastatempaj respondoj estis en sama ordo kiel ĉi-supre:

• por naciisma marina le pen 15 %
• por liberalisma nikolao sarkozy 25 %
• por moderisma francisko bayrou 12 %
• por naturprotekta eva joly 3 %
• por socialisma francisko hollande 34 %
• por kontraŭkapitalisma ĵan-luko mélenchon 8 %
• por la aliaj kvin kandidatoj 2,5 % da restantaj voĉoj.

al tiuj nombroj ne fidu.  la kandidatoj jen gajnas, jen malgajnas elcentojn de tago al tago, laŭ la publikaj humoroj, kiuj kvazaŭ pli dependas de la vetero ol de politikaj programoj.  nuntempe malvarmas, je ĉirkaŭ -7 celsiaj gradoj matene.  ĝis la baloto tio ŝanĝiĝos.