antaŭe ĉiu telefonfirmao devigis vin al rezigno pri la numero kune kun la lineo, kaj la nova firmao donis novan numeron el sia provizo. tio premis la abonantojn al restado ĉe la sama provizanto. la leĝo faciligis la ŝanĝadon, garantiante, ke vi ne devos je ĉiu ŝanĝo atentigi ĉiujn konatojn pri nova numero. tiu leĝo el 2006-2007 estis planita por akrigi la konkurencon kaj malaltigi la prezojn, sed ĝi ne efikis – la tri grandaj telefonkompanioj (laŭnome bouygues /bŭig/, orange /orãĵ/ kaj sfr) videble akordiĝis pri prezoj kaj mirinde estas nur, ke neniu procesis kontraŭ ili pro tio.
poŝtelefonon mi malmulte uzas. mi do dekomence elektis sen-abonan uzadon, aĉetante de malgranda firmao kartojn aŭ reŝarg-numerojn, kiuj provizas difinitajn nombrojn de minutoj. ĝi pli kostas laŭ tempo sed taŭgas por tia uzo.
lastatempe la merkaton envenis kvara granda kompanio (free /fri/), kiu proponis pli malaltajn abonprezojn, kaj devigis la aliajn al rearanĝo de ofertoj. la ĝenerala malaltigo estis drasta: tipa monata abono por du horoj da alparolo kaj senlima tekstado kostis antaŭe 30 eŭrojn, nun inter 2 kaj 12 eŭrojn.
mi juĝis, ke la tempo maturas por abono. mi esploris la retejon de mia provizanto (virgin mobile), sed ne bone komprenis, kiel mi ŝanĝu de per-karta al po-monata sistemo. mi do vizitis butikon:
— mi havas telefonnumeron ĉe vi, mi deziras ŝanĝi de karta al abona sistemo.
— tio eblas, sed mi avertas, ke vi ricevos novan numeron.
— ĉu ne eblas konservi la numeron?
— tio eblos nur, se vi faros tion interete aŭ telefone.
mi jam konstatis, ke interrete ne eblas. mi telefonis al la kompanio.
— halo, mi deziras ŝanĝi de karta al abona sistemo.
— jes volonte, mi do petos pri viaj nomoj, adresoj, kreditkarta numero...
— antaŭ ol ni komencos, ĉu vi bonvole konfirmos, ke mi konservos la numeron?
— mi bedaŭras, ne, se vi ŝanĝos al abono, vi ricevos novan numeron.
— sed se mi ŝanĝos la provizanton, mi ja konservos la numeron ĉu?
— jes, certe, kaj poste vi povos reveni al ni.
— bone, dankon, ĝis.
do mi ŝanĝis la provizanton.
mi kontrolis, efektive la leĝo precize diras, ke estas devige konservi la numeron ricevitan de antaŭa telefonkompanio. pri ŝanĝo de sistemo ĉe sama kompanio ĝi diras nenion, kaj la kompanio ne penis difini proceduron por tio.
Aucun commentaire:
Enregistrer un commentaire